Siyəzən Rayon İcra və Probasiya Şöbəsinin keçmiş rəisinin qeyri-rəsmi sürücüsü, böyük icra məmurunun həyat yoldaşı Orxan Orucov iki nəfərə qarşı dələduzluqda təqsirli bilinib. O, özünü ədliyyə işçisi kimi təqdim edərək bir şəxsin adına kredit götürüb, digər zərərçəkmişdən isə "vəzifəyə təyinat" vədi ilə 14 min manata yaxın pul alıb.
Teleqraf.com-un məlumatına görə, istintaq zamanı Orucovun həyat yoldaşına məxsus xidməti geyimlərdən və dövlət avtomobilindən istifadə etməklə rəsmi işçi görüntüsü yaratdığı müəyyən edilib. Pullar şəxsi ehtiyaclarına xərclənib.
Maraqlıdır ki, Siyəzən Rayon Məhkəməsinin hakimi Bəylər Ələkbərov birinci instansiyada Orucov barəsində bəraət hökmü çıxarıb. Dövlət ittihamçısı bu qərarı əsassız sayaraq bildirib ki, iş birtərəfli araşdırılıb və sübutlara lazımi hüquqi qiymət verilməyib.
Prokurorluğun apellyasiya şikayətindən sonra Sumqayıt Apellyasiya Məhkəməsi bəraət hökmünü ləğv edib. Yeni qərarla Orxan Orucov 2 il 7 ay müddətinə azadlığın məhdudlaşdırılması cəzasına məhkum edilib.
Qalmaqaldan sonra şöbənin keçmiş rəisi Kənan Əzizovun vəzifədən azad edildiyi də bildirilir.
