"Qumar kralı" kimi tanınan Yusif Baqiyevin böyük sərvətə yiyələndiyi üzə çıxıb. Baş Prokuror yanında Korrupsiyaya qarşı Mübarizə Baş İdarəsi tərəfindən ifşa edilən Baqiyevin təxminən 10 milyon manat dəyərində əmlakı istintaq orqanları tərəfindən nəzarətə götürülüb.
Qafqazinfo.az-ın məlumatına görə, məhkəmə qərarı ilə üzərinə həbs qoyulan əsas əmlakların siyahısı açıqlanıb.
Az qala, Şəkinin yarısını "alıbmış"Siyahıdan görünür ki, Yusif Baqiyevin özünün, həyat yoldaşının və yaxın qohumlarının adına rəsmiləşdirilən əmlakların böyük hissəsi Şəki şəhərində yerləşir. Şəhərin demək olar ki, hər hissəsində mülklərə sahib olan Baqiyevin Şəkidəki əmlaklarının ümumi dəyəri təxminən 5 milyon manat qiymətləndirilir.
Həbs qoyulan əmlaklar arasında:
Fərdi yaşayış evləri, villalar və mənzillər; müxtəlif ərazilərdə yerləşən çoxsaylı torpaq sahələri;
Qeyri-yaşayış sahələri və kommersiya obyektləri;
Qoxmuq kəndində geniş ərazini əhatə edən böyük qeyri-yaşayış kompleksi;
Bakı və Abşerondakı mülklər;
Lüks avtomobillər ("Lamborghini Urus" və "Mercedes-Benz G63 AMG")
Qeyd olunur ki, açıqlanan siyahı məhkəmə qərarı ilə həbs qoyulan əsas əmlakları əhatə edir. Bundan əlavə, prokurorluqda Baqiyevə aid olduğu ehtimal edilən və cinayət yolu ilə əldə olunan vəsaitlər hesabına alınması şübhə doğuran başqa mülklərlə bağlı da araşdırmalar aparılır.
Hazırda cinayət işi üzrə məhkəmə baxışı davam edir. İttihama görə, Yusif Baqiyev və onun rəhbərlik etdiyi mütəşəkkil dəstənin üzvləri 41 milyon manatdan artıq qanunsuz vəsaiti müxtəlif bank hesabları və əmlak alqı-satqısı yolu ilə leqallaşdırıblar.
