Şəki bazarındageyim mağazalarının işçiləri arasında baş verən mübahisə dava ilə nəticələnib.
Məhkəmə xuliqanlıqda təqsirləndirilən Elnarə Zahidovanın (ad və soyadı şərtidir) barəsindəki hökmdən verilən apellyasiya şikayətinə baxılıb. Hakim Zamin Tahirov müdafiə tərəfinin şikayətini qismən təmin edib.
Məhkəmənin qərarına əsasən, Şəki Rayon Məhkəməsinin hökmü yalnız mülki iddia hissəsində dəyişdirilib və Elnarə Zahidovadan zərərçəkmişin xeyrinə 2500 manat tutulmasına qərar verilib.
İttihama görə, hadisə Şəki bazarında fəaliyyət göstərən geyim mağazalarının qarşısında baş verib. Elnarə Zahidova qonşu mağazada çalışan Nazilə Məlikovanın (adı və soyadı şərtidir) anasının obyektin qarşısına paltar asılması ilə bağlı iradını qəbul etməyib.
İstintaq materiallarına əsasən, təqsirləndirilən şəxs ictimai yerdə zərərçəkmiş şəxsi nalayiq ifadələrlə təhqir edib, onu döyməklə hədələyib və fiziki zor tətbiq edib. Mübahisə zamanı Nazilə Məlikovaya çoxsaylı yumruq zərbələri endirilib.
Elnarə Zahidovaya Cinayət Məcəlləsinin 221.1-ci maddəsi (qərəzli xuliqanlıq) ilə ittiham irəli sürülüb.
Lakin Şəki Rayon Məhkəməsi "Konstitusiya və Suverenlik İli" münasibətilə qəbul olunmuş amnistiya aktını tətbiq edərək onun barəsində cinayət təqibinə və iş üzrə icraata xitam verib.
Mənbə: Pravda.az
