Qusar şəhərində 25 yaşlı Tural həmyerlisi İzmir Nağıyevə xəsarət yetirməkdə ittiham olunub.
Hadisə N. Nərimanov adına parkda baş verib.
İttihama görə, Tural "TikTok"da aralarında yaranan mübahisədən sonra İzmirin sifət nahiyəsinə kəllə zərbəsi endirib.
Məhkəmədə Tural hadisədən əvvəl sosial şəbəkədə İzmir ilə qarşılıqlı şəkildə nalayiq ifadələr işlətdiklərini bildirib. Daha sonra məsələni həll etmək üçün parkda görüşdüklərini, burada yenidən mübahisə yarandığını və əsəbiləşərək İzmirə bir dəfə kəllə zərbəsi vurduğunu etiraf edib.
Zərərçəkmiş isə əvvəlcə Turalın qardaşı Fuadla mübahisə yarandığını, daha sonra Turalın ona kəllə ilə zərbə endirdiyini deyib.
İzmir təqsirləndirilən şəxslə barışdığını, ona qarşı şikayət və tələbinin olmadığını bildirib.
Qusar Rayon Məhkəməsinin hökmü ilə Tural 1 il müddətinə azadlığın məhdudlaşdırılması cəzasına məhkum edilib.
Hökmə əsasən, həmin müddətdə o, hər gün saat 22:00-dan 07:00-dək yaşadığı evi tərk edə bilməz və Qusar rayonunun ərazisindən çıxa bilməz. Bundan əlavə, onun üzərinə elektron nəzarət vasitəsi gəzdirmək və digər məhdudiyyətlər qoyulub.
Qeyd edək ki, Tural II Qarabağ müharibəsinin iştirakçısıdır. O, "Füzulinin azad olunmasına görə" və "Xocavəndin azad olunmasına görə" medalları ilə təltif olunub.
Mənbə: Demokrat.az
