Bu gün Vətən müharibəsinin qəhrəman zabitlərindən biri, polkovnik-leytenant Babək Ramaldanovun şəhid olmasının altıncı ildönümüdür.
Babək Meyvəddin oğlu Ramaldanov 1982-ci il avqustun 9-da Bakı şəhərində anadan olub. Əslən Qusar rayonundandır.
1989-1997-ci illərdə Xətai rayonundakı 59 nömrəli tam orta məktəbdə, 1997-2000-ci illərdə isə Cəmşid Naxçıvanski adına Hərbi Liseydə təhsil alıb.
2004-cü ildən Azərbaycan Ordusunda xidmətə başlayan Babək Ramaldanov üçün Vətənin müdafiəsi hər şeydən vacib, işğal altında olan torpaqlarımızı azad görmək arzusu isə bütün arzularından üstün olub. Bu amalına çatmaq üçün gecə-gündüz öz üzərində çalışıb.
Polkovnik-leytenant 2019-cu il iyunun 21-də Moskvada Rusiya Federasiyası Silahlı Qüvvələrinin Ümumqoşun Akademiyasını fərqlənmə ilə bitirərək magistr diplomu və qızıl medal alıb.
Babək Ramaldanov 2020-ci il sentyabrın 27-də başlayan Vətən müharibəsində şəxsi heyəti ilə birlikdə 10 gün Murovdağ istiqamətində, daha sonra isə Füzuli və Cəbrayıl istiqamətlərində aparılan əməliyyatlarda iştirak edib.
O, oktyabrın 16-da Cəbrayıl rayonunun Hovuslu kəndinin azadlığı uğrunda döyüşlərdə tapşırığı yerinə yetirərkən qəhrəmancasına şəhid olub.
Babək Ramaldanov ölümündən sonra "Vətən uğrunda", "Cəbrayılın azad olunmasına görə", "Füzulinin azad olunmasına görə" medalları və "Azərbaycan Bayrağı" ordeni ilə təltif edilib.
