Qusar rayonunun Əniq kəndində sakinlərin istifadə etdiyi körpü aylardır yararsız vəziyyətdədir, yeni körpünün tikintisi isə yarımçıq qalıb.
Shimal.News-a danışan sakinlərin sözlərinə görə, yaz aylarında yağan güclü yağışlar nəticəsində kəndin ortasından keçən çayın üzərindəki körpü sıradan çıxıb. Aradan xeyli vaxt keçsə də problem hələ də həllini tapmayıb.
Sakinlərin bildirdiyinə görə, hadisədən sonra aidiyyəti qurumlar kəndə gəlib, yerində göstəriş veriblər. Bundan sonra yeni körpünün bünövrəsi qurulub, lakin tikinti işləri bu günədək başa çatdırılmayıb.
Hazırda sakinlər çayı keçmək üçün müvəqqəti qaydada düzəldilmiş keçiddən istifadə edirlər. Onların sözlərinə görə, bu keçid yağışlı havalarda təhlükəli olur: sel gələndə su keçidin kənarlarından və üstündən aşır, nəticədə insanlar çayın o biri tərəfinə keçə bilmir.
Sakinlər yeni körpünün tikintisinin tezliklə başa çatdırılmasını və kənddə gündəlik gediş-gəlişin təhlükəsiz şəkildə bərpa olunmasını tələb edirlər.
