Orxan İmran oğlu Ömərov 1991-ci il oktyabrın 17-də Quba rayonunun Qonaqkənd qəsəbəsində anadan olub. Qonaqkənd qəsəbə tam orta məktəbində təhsil alıb. Subay idi.

Orxan Ömərov 2009-cu ildə Azərbaycan Silahlı Qüvvələrində müddətli həqiqi hərbi xidmət keçib. 2013-cü ildən Azərbaycan Respublikası Daxili İşlər Nazirliyinin Daxili Qoşunlarında müddətdən artıq həqiqi hərbi xidmət qulluqçusu kimi xidmət edib.

Daxili Qoşunların çavuşu olan Orxan Ömərov 2020-ci il sentyabrın 27-də başlanan Vətən müharibəsi zamanı Füzulinin və Şuşanın azadlığı uğrunda gedən döyüşlərdə iştirak edib. O, noyabrın 7-də Şuşa döyüşləri zamanı şəhid olub. Quba rayonunun Qonaqkənd qəsəbəsində dəfn olunub.

Orxan Ömərov ölümündən sonra "Vətən uğrunda" və "Şuşanın azad olunmasına görə" medalları ilə təltif edilib.

Vüqar Məmmədqasım oğlu İsmayılov 1992-ci il oktyabrın 17-də Şabran rayonunda anadan olub. Məktəbi bitirdikdən sonra 2010-cu ildə hərbi xidmətə yollanıb.

2013-cü ildən Azərbaycan Respublikası Daxili İşlər Nazirliyinin Daxili Qoşunlarının Xüsusi Təyinatlı Dəstəsində xidmətə başlayıb. Daxili İşlər Nazirliyində keçirilən sambo və cüdo yarışlarında dəfələrlə birinci yerə layiq görülüb.

2019-cu ildən Müdafiə Nazirliyinin N saylı hərbi hissəsində kəşfiyyatçı kimi xidmət edib.

Vüqar İsmayılov İkinci Qarabağ müharibəsində iştirak edib. O, iki dəfə yaralanmasına baxmayaraq, müharibənin son gününə qədər döyüşüb.

Azərbaycan Silahlı Qüvvələrinin hərbi qulluqçusu olan Vüqar İsmayılov 2023-cü il sentyabrın 19-dan 20-nə keçən gecə Xocalı rayonunun Dağyurd kəndi istiqamətində gedən döyüşlərdə şəhid olub.

O, "Füzulinin azad olunmasına görə", "Xocavəndin azad olunmasına görə", "Şuşanın azad olunmasına görə", "Cəsur döyüşçü" və "Vətən uğrunda" medalları, həmçinin 3-cü dərəcəli "Vətənə xidmətə görə" ordeni ilə təltif edilib.

Taleh Abil oğlu Qənbərli 1994-cü il oktyabrın 17-də İsmayıllı rayonunun Quşencə kəndində anadan olub.

Azərbaycan Ordusunun əsgəri olan Taleh Qənbərli 2020-ci il sentyabrın 27-də başlanan Vətən müharibəsi zamanı Füzulinin və Şuşanın azadlığı uğrunda gedən döyüşlərdə iştirak edib. O, noyabrın 6-da Şuşa döyüşləri zamanı şəhid olub.

Taleh Qənbərli ölümündən sonra "Vətən uğrunda", "Füzulinin azad olunmasına görə" və "Xocavəndin azad olunmasına görə" medalları, "Şuşanın azad olunmasına görə" medalı, həmçinin 3-cü dərəcəli "Vətənə xidmətə görə" ordeni ilə təltif edilib.

Mirbala Əmrağa oğlu Rəsulov 1989-cu il oktyabrın 17-də Şabran rayonunun Rəhimli kəndində anadan olub. Ailəli idi. Ondan iki qız övladı yadigar qalıb.

Azərbaycan Ordusunun kiçik giziri olan Mirbala Rəsulov 2020-ci il sentyabrın 27-də başlanan Vətən müharibəsi zamanı Cəbrayılın və Füzulinin azadlığı uğrunda gedən döyüşlərdə iştirak edib. O, oktyabrın 6-da Füzuli döyüşləri zamanı şəhid olub. Şabran rayonunun Rəhimli kəndində dəfn olunub.

Mirbala Rəsulov ölümündən sonra "Vətən uğrunda", "Cəsur döyüşçü", "Cəbrayılın azad olunmasına görə" və "Füzulinin azad olunmasına görə" medalları, həmçinin "Azərbaycan Bayrağı" ordeni ilə təltif edilib.