Ötən ilin avqustunda Qusar Rayon Mərkəzi Xəstəxanasında doğuşdan sonra həyatını itirən 32 yaşlı Yasəmən Ospatovanın ölümü ilə bağlı araşdırma yenidən aparılacaq.
Məlumata görə, iki uşaq anasının hüquqi varisi cinayət işinin başlanmasının rədd edilməsi barədə qərarın ləğvi üçün Sumqayıt Apellyasiya Məhkəməsinə müraciət edib.
Apellyasiya instansiyası müraciəti təmin edib. Material yenidən tam və hərtərəfli araşdırılması üçün Qusar Rayon Məhkəməsi vasitəsilə prosessual rəhbərliyi həyata keçirən Qusar rayon prokuroruna qaytarılıb.
Məhkəmədə zərərçəkmiş şəxsin hüquqi varisi bildirib ki, Yasəmən Ospatovanın ölümünə əməliyyat zamanı intubasiya borusunun səhv yerləşdirilməsi səbəb olub.
Ekspertiza rəyində isə Qusar Rayon Mərkəzi Xəstəxanasında reanimasiya tədbirləri zamanı intubasiya borusunun traxeya əvəzinə qida borusuna yeridildiyi qeyd olunub. Rəyə əsasən, nəticədə ağciyərin tənəffüssüz qalması və digər ağır fəsadlar baş verib.
Sənədlərdə həmçinin doğuşayardım xidmətinin göstərilməsi zamanı bir sıra pozuntuların olduğu iddia edilir. Xəstənin əməliyyata gec götürüldüyü, əməliyyatdan əvvəl əsaslandırılmadan aşağı molekul çəkili heparin təyin edildiyi, zahı qadının nəzarət məqsədilə ayıltma otağında saxlanılmadığı və gec aktivləşdirildiyi bildirilib.
Bundan başqa, doğum şöbəsinin mama-ginekoloqu tərəfindən tibbi sənədləşmə ilə bağlı tələblərin də pozulduğu qeyd olunub.
Yasəmən Ospatovanın yaxınları daha əvvəl qeysəriyyə əməliyyatı üçün həkimin onlardan 370 manat aldığını da bildiriblər. Zərərçəkmişin hüquqi varisləri bu faktın da araşdırılmasını istəyiblər.
Qeyd edək ki, məhkəmənin işin yenidən araşdırılması barədə qərarı tibbi səhlənkarlıq və ya digər ittihamların artıq təsdiqləndiyi anlamına gəlmir. Faktlara hüquqi qiymət araşdırmanın nəticəsindən sonra veriləcək.
Mənbə: Musavat.com
