Quba rayonunda iki qardaş arasında yaranan mübahisə cinayət işi ilə nəticələnib.
Hadisə Qırmızı qəsəbədə baş verib.
1985-ci il təvəllüdlü Nadir (şərti ad) ailə-məişət münasibətləri zəminində yaranan mübahisə zamanı qardaşı Daşdəmirə (şərti ad) yumruqla zərbələr endirib.
Faktla bağlı Nadir barəsində Cinayət Məcəlləsinin 128-ci maddəsi ilə ittiham irəli sürülüb.
Təqsirləndirilən şəxs məhkəmədə özünü təqsirli bilib. O, ifadəsində hadisə zamanı qardaşının spirtli içkinin təsiri altında olduğunu və ona içki qəbul etməməyi tövsiyə etdiyini bildirib. Qardaşının sözlərinə əhəmiyyət verməməsi səbəbindən aralarında mübahisə yarandığını deyən kişi əsəbiləşərək onun üz nahiyəsinə yumruqla zərbə vurduğunu etiraf edib.
Nadir əməlindən peşman olduğunu və qardaşı ilə barışdığını bildirib.
Quba Rayon Məhkəməsinin hökmü ilə o, 6 ay müddətinə azadlığın məhdudlaşdırılması cəzasına məhkum edilib.
Hökmə əsasən, bu müddət ərzində ona Quba rayonunun inzibati ərazi hüdudlarını tərk etmək, həmçinin hər gün saat 23:30-dan 06:30-dək yaşayış yerindən çıxmaq qadağan olunub.
Mənbə: Demokrat.аz
