2014-cü ildə İsmayıllı rayonunda 81 yaşlı Rəbiyyə Talıbovanı qətlə yetirən və 17 il 6 ay azadlıqdan məhrum edilən Elbrus Cəbiyev həbsxanada özünə xəsarət yetirdiyinə görə yenidən mühakimə olunub.
Teleqraf.az-ın məlumatına görə, o, cəza çəkdiyi müəssisədə kustar üsulla hazırlanmış deşici alət - mismar saxlayıb və həmin alətlə qarın nahiyəsinə xəsarət yetirib. Daha sonra mühafizəçilərin müşayiəti ilə Şəki Rayon Mərkəzi Xəstəxanasına aparılıb. Həkimlər yad cismi əməliyyatla çıxarıblar.
Təqsirləndirilən şəxs bildirib ki, anasının gətirdiyi sovqatın arasında qadağan edilmiş maddənin aşkar edilməsi ilə bağlı başlanan araşdırmaların qeyri-obyektiv aparıldığını düşündüyü üçün stress keçirib və bu addımı atıb.
Şəki Rayon Məhkəməsinin hökmü ilə ona əlavə 4 ay cəza verilib. Cəzalar qismən birləşdirilib və üzərində qəti olaraq 6 il 2 ay həbs müddəti saxlanılıb.
Qeyd edək ki, E.Cəbiyev daha əvvəl kirayə qaldığı evin həyətində keçmiş qonşusu Rəbiyyə Talıbovanı küt alətlə qətlə yetirib, meyiti gizlədib, sonra isə yol kənarına atmışdı.
