Qəbələnin Solquca kəndində həmkəndlisini öldürməkdə təqsirləndirilən Teymur Səfərəliyevin məhkəmədə verdiyi ifadə açıqlanıb.
Şəki Ağır Cinayətlər Məhkəməsində Teymur özünü ittiham üzrə qismən təqsirli bilib.
O, Dəmir Eyvazovu xüsusi amansızlıqla öldürmədiyini deyib. Təqsirləndirilən şəxsin sözlərinə görə, mərhum uzun müddət onu narahat edib və müxtəlif qurumlara, o cümlədən Qəbələ Rayon Prokurorluğuna onunla bağlı şikayətlər edib.
Səfərəliyev bildirib ki, hadisədən əvvəlki 10 gün ərzində Dəmir Eyvazov bir neçə dəfə onun evinə gələrək 10 min manat aliment borcunu ödəməsini tələb edib və oğlunu öldürməklə hədələyib.
Onun sözlərinə görə, hadisə günü onlar birlikdə meşəyə odun yığmağa gediblər. Burada Eyvazov Nic qəsəbəsinə kömür aparmağı da istəyib. Yanacaq və pul məsələsinə görə aralarında mübahisə yaranıb və Eyvazov onu təhqir etməyə başlayıb.
Teymur Səfərəliyev ifadəsində bildirib ki, əvvəlcə Dəmir Eyvazovu dəhrə ilə bel nahiyəsindən qorxutmaq məqsədilə vurub. Eyvazov yerə yıxıldıqdan sonra isə onun başına zərbə endirib.
"Mən həmin an onun ölüb-ölmədiyini bilmirdim. Əvvəlcədən onu öldürmək niyyətim olmayıb", – deyə təqsirləndirilən şəxs bildirib.
Səfərəliyev hadisədən sonra prokurorluğa gedərək təslim olduğunu deyib. O, ümumilikdə neçə zərbə vurduğunu xatırlamadığını bildirib.
İttihama əsasən, 1986-cı il təvəllüdlü Teymur Səfərəliyev 1974-cü il təvəllüdlü həmkəndlisi Dəmir Eyvazovu qəsdən öldürüb. Hadisə 16 iyun 2025-ci ildə Qəbələ rayonunun Solquca kəndində baş verib.
Məhkəmənin hökmü ilə Teymur Səfərəliyev 10 il 6 ay müddətinə azadlıqdan məhrum edilib.
Mənbə: Pravda.az
