Şamaxıda MMA üzrə məşqçi Orxan Hacıyevin qətli ilə bağlı məhkəmə prosesi başa çatıb.
Xitab24.az-ın məlumatına görə, məhkəmənin hökmü ilə cinayəti törətməkdə təqsirli bilinən 28 yaşlı Amil Surxayev 14 il müddətinə azadlıqdan məhrum edilib.
İş materiallarına əsasən, təqsirləndirilən şəxs ifadəsində cinayəti qisas məqsədilə törətdiyini etiraf edib. O, qardaşı Ruslan Surxayevin 2020-ci ildə Orxan Hacıyev tərəfindən öldürülməsi və həmin iş üzrə sonradan çıxarılan hökmü qəbul edə bilmədiyini bildirib.
Məlumata görə, Amil Surxayev Orxan Hacıyevin həbsdən azad olunmasından sonra onun izinə düşərək Şamaxıda yaşadığı ünvanı müəyyən edib. Daha sonra mərhum qardaşına məxsus silahla evinə gələrək onu qarın nahiyəsindən güllələyib. Ağır yaralanan idmançı xəstəxanaya çatdırılsa da, həyatını xilas etmək mümkün olmayıb.
Hadisədən sonra Amil Surxayev könüllü olaraq polisə təslim olub və əməlindən peşman olmadığını bildirib.
Qeyd edək ki, Ruslan Surxayev sərbəst güləş üzrə gənclər arasında Avropa çempionu, yeniyetmələr arasında Avropa birinciliyinin qalibi və dünya birinciliyinin gümüş mükafatçısı olub. Orxan Hacıyev isə həmin iş üzrə əvvəlcə qəsdən adam öldürmə ittihamı ilə mühakimə olunmuş, daha sonra əməl zəruri müdafiə həddini aşmaq kimi qiymətləndirilərək azadlığa buraxılmışdı.
