İsmayıllı rayonu ərazisində qanunsuz yolla əldə edilən ağac materiallarının daşınması faktı aşkarlanıb.
Qaynarinfo.az-ın məlumatına görə, sözügedən ağaclar İsmayıllı rayonunun meşə massivlərində qanunsuz şəkildə kəsilib.
Məlumatı verən mənbə iddia edir ki, hadisənin arxasında Şahdağ Milli Parkının İsmayıllı bölməsində sahə müfəttişi vəzifəsində çalışan Əfqan Qəribov dayanır. Bildirilir ki, o, ağac materialı daşıyan "ZİL" markalı yük avtomobilini saxlayan Ekologiya və Təbii Sərvətlər Nazirliyinin əməkdaşlarını təhdid edib.
Faktla bağlı redaksiyaya video və foto materiallar da təqdim olunub.
Məsələ ilə əlaqədar Ekologiya və Təbii Sərvətlər Nazirliyi ilə əlaqə saxlanılıb. Nazirliyin açıqlamasında bildirilib ki, 2026-cı il fevralın 2-dən 3-nə keçən gecə İsmayıllı rayonu ərazisində qanunsuz yolla əldə edilmiş ağac materialının "ZİL" markalı avtomobillə daşınması faktı nazirliyin əməkdaşları tərəfindən aşkar edilib və 3 fevral tarixində aktlaşdırılıb. Hazırda faktla bağlı araşdırma davam etdirilir.
Əfqan Qəribovun özü ilə məsələ bağlı mövqeyini öyrənmək mümkün olmayıb.
Qeyd edək ki, Əfqan Qəribovun adı daha əvvəl də ağacların qanunsuz kəsilməsi ilə bağlı hallanıb. Mediaya açıqlanan məlumatlara görə, o, keçmiş ekologiya və təbii sərvətlər naziri Muxtar Babayevin rəhbərliyi dövründə vəzifəsindən azad edilib. Muxtar Babayev nazir vəzifəsindən ayrıldıqdan sonra isə Əfqan Qəribovun yenidən işə götürüldüyü, lakin başqa vəzifəyə təyin edildiyi bildirilir.
