Ağsu rayonunda 30 yaşlı kişi arvadına zəng edən uşaqlıq dostunu bıçaqlayıb.
Teleqraf.az-ın məlumatına görə, hadisə ötən il yanvarın 7-də Ağsu rayonunun kəndlərindən birində baş verib. 1996-cı il təvəllüdlü Fəqan yanvarın 6-da Bakıda olarkən həyat yoldaşı Səmayənin telefonuna həmyerlisi və uşaqlıq dostu Sərxanın "WhatsApp" vasitəsilə zəng etdiyini görüb. Bunun səbəbini aydınlaşdırmaq üçün onunla görüşməyə qərar verib.
Yanvarın 7-si gecə saat 04:30 radələrində Ağsu rayonunda görüş zamanı mübahisə yaranıb. Mübahisə zamanı Fəqan bıçaqla Sərxanın döş qəfəsinə bir zərbə vurub.
İstintaq zamanı Fəqan Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə ittiham olunub və özünü təqsirli bilib. O ifadəsində bildirib ki, həmin mobil nömrəni əvvəllər özü istifadə edib, lakin Vətən müharibəsində aldığı xəsarətlər səbəbindən bunu unutduğunu deyib. Qısqanclıq və yaranmış anlaşılmazlıq səbəbindən Sərxana inanmadığını, bir anlıq özünü itirərək bıçaq vurduğunu qeyd edib. Hadisədən dərhal sonra DİN-in 102 qaynar xəttinə zəng etdiyini də bildirib.
Zərərçəkmiş Sərxan isə deyib ki, həmin nömrəni Fəqanın nömrəsi bildiyi üçün zəng edib. Onun sözlərinə görə, Fəqan Ağsuya gəldikdən sonra sakit yerdə söhbət etmək istəyib və kəndə getdikləri zaman qəfil bıçaqlanıb.
Şəki Ağır Cinayətlər Məhkəməsinin hökmü ilə Fəqana Cinayət Məcəlləsinin 70-ci maddəsi tətbiq olunub. O, 2 il sınaq müddəti olmaqla 3 il şərti cəzaya məhkum edilib.
