Zaqatala rayonunda çayçılıq uzun illərdir əsas gəlirli sahələrdən biridir.
AZƏRTAC-ın məlumatına görə, bu il rayonun Qazangül qəsəbəsində fəaliyyət göstərən çayçılıq təsərrüfatlarında bol məhsul yetişib.
Havaların yağmurlu keçməsi yaşıl çay yarpaqlarının daha yaxşı və keyfiyyətli yetişməsinə şərait yaradıb. Hazırda çayçılar növbəti dərimi həyata keçirirlər. Yaşıl çay yarpaqlarını səhərin erkən saatlarında toplamaq vacibdir. Ona görə də çayçılar bu kimi şərtlərə ciddi əməl edirlər.
Təsərrüfat rəhbəri Pərviz Şabanovun sözlərinə görə o, çay sahələrinin ömrünü artırmaq məqsədi ilə plantasiyanın 50 faizinə damcı suvarma sistemi quraşdırıb. Qarşıdakı illərdə qalan sahələrdə də bu sistemin tətbiqi nəzərdə tutulur.
Çayçılıq təsərrüfatı ilə fermerlər arasında ilin əvvəlində məhsulun alqı-satqısına dair müqavilə bağlanılır. Yəni fermerin məhsul satışı ilə bağlı heç bir qayğısı yoxdur. Əsas odur ki, məhsul keyfiyyətli və normativ qaydalara uyğun olsun.
Plantasiyada çayçıların sürətlə işləməsini müşahidə edirik, ilk baxışdan elə düşünürsən ki, məhsul yığımı asandır.
“İndi çay yığımının üçüncü mərhələsidir. Keçən illərə nisbətən bu il məhsulumuz boldur. Bu, hava şəraitindən asılıdır. Havaların yağmurlu keçməsi çayçılıq üçün əlverişli sayılır”, - deyən Tünzalə xanımdan gün ərzində neçə kiloqram məhsul yığdıqları ilə maraqlanırıq. “May ayında səhər saat 6-dan 10-a kimi 50-60 kiloqram yığırıq. İndi isə bu çayı dənə-dənə, yarpaqsız yığmaq lazımdır, ona görə gün ərzində 30-40 kiloqram yığa bilirik”, - deyə sahədə çalışan Tünzalə Muhumayeva bildirib.
Məlumat üçün bildirək ki, çay kolları əkiləndən 8-10 il sonra ilk barını verir. Tam barvermə müddəti isə 20-25 ilə başa gəlir.
