Zaqatala rayonunda fəaliyyət göstərən heyvan bazarlarında biotəhlükəsizlik və müasir standartlara uyğun yenidənqurma işləri başa çatdırılıb.
Shimal.News xəbər verir ki, Azərbaycan Qida Təhlükəsizliyi Agentliyinin (AQTA) qiymətləndirməsindən sonra bazarların fəaliyyətinə icazə verilib.
Yenilənmə çərçivəsində bazarların giriş-çıxış hissələrində dezbaryerlər quraşdırılıb, xəstəlik əlamətləri aşkarlanan heyvanların digərlərindən təcrid edilməsi üçün xüsusi izolyatorlar yaradılıb.
Ərazilər asfaltlanıb, heyvanların təhlükəsiz hərəkəti üçün rampalar və çardaqlar quraşdırılıb. Baytar həkimlərin nəzarəti həyata keçirməsi üçün də xüsusi məntəqə yaradılıb.
AQTA-nın qiymətləndirməsinə əsasən, bazarlarda bioloji təhlükəsizliyin və dövlət baytarlıq nəzarətinin təmin edilməsi üçün zəruri şərait yaradılıb. Həmçinin yeni və yenidən qurulan bazarlarda heyvanların identifikasiyası sisteminin tətbiqi üçün imkan yaradılıb.
Bu sistem heyvanların təsərrüfatlar arasında, eləcə də təsərrüfatlardan kəsim məntəqələrinə qədər izlənməsinə imkan verəcək.
Qeyd edək ki, ölkə üzrə artıq 20 heyvan bazarı müvafiq baytarlıq-sanitariya norma və qaydalarına uyğun yenidən qurularaq istifadəyə verilib. Digər bazarlarda da yenidənqurma və abadlaşdırma işləri davam etdirilir.
