Azərbaycanın qədim qızılgülçülük ənənələri ilə tanınan Zaqatala rayonunda bu sahənin yenidən dirçəldilməsi istiqamətində mühüm nəticələr əldə olunub. 2016-cı ildən fəaliyyət göstərən "Ləcheq Farm and Distillery" MMC bölgədə saldığı geniş qızılgül plantasiyaları və istehsal etdiyi efir yağları ilə artıq dünya bazarında tanınan brendə çevrilib.
AZƏRTAC-ın məlumatına görə, müəssisə tərəfindən ilkin mərhələdə 183 hektar sahədə Dəməşq qızılgülü, əlavə olaraq isə 10 hektar ərazidə lavanda və nanə plantasiyaları yaradılıb. Yaxın illərdə əkin sahələrinin 500 hektara çatdırılması planlaşdırılır. Bu məqsədlə Zaqatala ilə yanaşı Balakən, Qax, Şəki, Oğuz və Qəbələ rayonlarından olan fermerlərlə əməkdaşlığa başlanılıb və əlavə 250 hektar sahədə yeni plantasiyaların salınması nəzərdə tutulur.
Müəssisənin aqronomu Cahangir Bayramov bildirib ki, hazırda efir yağı sənayesi üçün uyğun digər bitkilərin də sınaq əkinləri aparılır. Bioloji və iqtisadi qiymətləndirmədən sonra həmin bitkilərin genişmiqyaslı istehsalına başlanılması planlaşdırılır.
Qeyd olunub ki, plantasiyalar tam müasir damlama suvarma sistemi ilə təchiz edilib. Bu yanaşma həm məhsuldarlığın artırılmasına, həm də torpağın eroziyadan və şoranlaşmadan qorunmasına imkan yaradır.
Müəssisədə istehsal tam orqanik üsullarla həyata keçirilir. Sahələrdə kimyəvi dərman, pestisid və sintetik gübrələrdən istifadə olunmur, zərərvericilərlə mübarizə yalnız bioloji üsullarla aparılır.
"Ləcheq Farm and Distillery" MMC regionda məşğulluğun artırılmasına da ciddi töhfə verir. Hazırda müəssisədə 60 nəfər daimi işçi çalışır. Mövsüm ərzində əlavə olaraq 60-90 nəfər işə cəlb olunur. May ayında başlayan qızılgül yığımı dövründə isə işçi sayı 1800-2000 nəfərə qədər yüksəlir.
Qızılgül yığımı hər gün səhər saat 06:00-da başlayır və 09:30-da başa çatır. Bildirilir ki, havanın temperaturu 25 dərəcəni keçdikdə güldəki efir yağları uçmağa başladığı üçün məhsul yalnız səhərin erkən saatlarında yığılır.
Müəssisənin istehsalat kompleksi 2017-ci ildə tikilib və ilk məhsulunu 2018-ci ildə verib. İstehsalat departamentinin rəhbəri Təbriz Allahverdiyev bildirib ki, hazırda müəssisədə yeni istehsal sahələrinin yaradılması istiqamətində araşdırmalar aparılır. Gələcəkdə daha saf və yüksək konsentrasiyalı gül ekstraktlarının istehsalı üçün yeni fabrikin inşası planlaşdırılır.
Müəssisənin texnoloji imkanları Azərbaycanda yabanı halda yetişən efir yağlı bitkilərin də emalına şərait yaradır. Artıq yovşan, boymadələn, kəklikotu, rozmarin, razyana və çobanyastığı kimi bitkilərdən test məqsədli efir yağları əldə olunub və beynəlxalq sərgilərdə nümayiş etdirilib.
Dünya üzrə illik qızılgül efir yağı istehsalının 4000–5000 kiloqram olduğu qeyd edilir. Bunun 200 kiloqramdan çoxu məhz Zaqatalada fəaliyyət göstərən müəssisənin payına düşür.
Şirkətin məhsulları indiyədək Almaniya, Fransa, ABŞ, Yaponiya, Çin, Türkiyə, BƏƏ və digər ölkələrdə keçirilən 21 beynəlxalq parfümeriya və kosmetika sərgisində nümayiş etdirilib və müxtəlif mükafatlara layiq görülüb.
Hazırda Zaqatala brendi Yaponiya, ABŞ, Böyük Britaniya, Fransa, Almaniya, Türkiyə və digər ölkələrin aparıcı şirkətlərinə məhsul ixrac edir. Müəssisənin istehsal etdiyi efir yağlarının "Azərbaycanın efir yağları" adı ilə Fransanın məşhur "Grasse" parfümeriya məktəbinin dərsliklərinə daxil edilməsi isə bu sahədə əldə olunan ən böyük uğurlardan biri hesab olunur.
