Zaqatala rayonunda builki barama mövsümündə yaş barama istehsalının 18 tona çatdırılması hədəflənir. Rayonda bu məqsədlə 270-ə yaxın kümçü ilə müqavilə bağlanılıb, ailə təsərrüfatlarına ümumilikdə 450 qutu ipəkqurdu paylanılıb.
AZƏRTAC-ın məlumatına görə, hazırda kəndlərdə ipəkqurdunun yemlənməsi prosesi davam edir.
Rayonun Göyəm kənd inzibati ərazi dairəsinə daxil olan kəndlərdə kümçü ailələri artıq istehsal mövsümünün ən məsul mərhələsinə başlayıblar. Sumaylı kənd sakini Zahidət Muradova bildirib ki, baramaçılıq qısa müddətdə gəlir gətirən sahələrdən biridir:
"Bir ay ərzində çəkdiyin zəhmətin nəticəsini görürsən. Bu il 52 qram ipəkqurdu götürmüşük. Məqsədimiz 200 kiloqrama yaxın yaş barama istehsal etməkdir", – deyə kümçü qeyd edib.
Ailə ötən mövsüm 210 kiloqram yaş barama istehsal edərək 2300 manatdan çox gəlir əldə edib. Kümçülər ipəkqurdunun bəslənməsi üçün xüsusi yerlər hazırlayıb, yem bazasını isə əsasən kənddəki tut ağaclarından təmin edirlər.
Dardoqqaz kənd sakini Rəfiqə Mehdiyeva isə artıq 4 ildir bu sahə ilə məşğul olduğunu deyib. Onun sözlərinə görə, ötən il ailələri 137 kiloqram yaş barama istehsal edib, builki mövsümdə isə nəticəni daha da artırmağı planlaşdırırlar.
Göyəm kənd inzibati ərazi dairəsi üzrə nümayəndə Ramazan Şabanov bildirib ki, ötən il dairəyə daxil olan kəndlərdə 1200 kiloqramdan çox yaş barama tədarük olunub və ailələr ümumilikdə 13 min manatdan artıq gəlir əldə ediblər.
Qeyd edək ki, builki mövsümdə də yaş baramanın hər kiloqramı üçün kümçülərə 11 manat ödənilməsi nəzərdə tutulur.
