İyunun 9-da Zaqatala rayonunda kümçülərdən yaş barama qəbuluna start verilib. Mövsümün ilk günündə rayonun barama qəbulu və qurutma məntəqəsinə 712,5 kiloqram yaş barama təhvil verilib.
AZƏRTAC-ın məlumatına görə, müəssisənin direktoru Faiq Köngülov bildirib ki, bu il rayonda 18 ton yaş barama istehsalı nəzərdə tutulur. Bunun üçün 270-ə yaxın kümçü ilə müqavilə bağlanılıb, onlara 450 qutu ipəkqurdu paylanıb. Əvvəlki illərdə olduğu kimi, bu il də ipəkqurdu toxumunun inkubasiyası müəssisədə həyata keçirilib.
Mövsümün ilk məhsulunu Mosul kənd sakini Səbuhi Əsgərov təhvil verib. Onun gətirdiyi yaş baramanın çəkisi 104 kq olub. Kümçü bildirib ki, uzun illərdir baramaçılıqla məşğuldur və bu sahə ailə büdcəsinə ciddi töhfə verir.
Mosul kəndində cari mövsümdə 8 kümçü ailəsinə 20 qutu ipəkqurdu paylanılıb. Kənd üzrə ümumilikdə 900 kiloqrama yaxın yaş barama istehsalı gözlənilir.
Rayonun Yuxarı Tala kənd sakini İlqar Əhmədli isə mövsümün ilk günündə 70 kq yaş barama təhvil verib. Kənddə baramaçılıqla məşğul olan 6 ailəyə 15 qutu ipəkqurdu verilib və onların 700 kq-ya yaxın məhsul istehsal etməsi planlaşdırılır.
"Azəripək" ASC-nin nümayəndəsi İlqar Nazarovun sözlərinə görə, qəbul edilən yaş baramanın keyfiyyəti tələb olunan standartlara cavab verir.
Qeyd edək ki, bu il ölkənin 40 rayonunda və Naxçıvan Muxtar Respublikasında barama yetişdirilib. Kümçülərə ümumilikdə 6491 qutu ipəkqurdu paylanıb. Mövcud qaydalara əsasən, yaş barama hər kiloqram üçün 5 manata qəbul olunur, əlavə olaraq dövlət tərəfindən hər kiloqrama görə 6 manat subsidiya ödənilir.
a
