Azərbaycanda peşə təhsili sisteminin inkişafı istiqamətində növbəti addımlar atılır. Prezident İlham Əliyevin imzaladığı müvafiq Sərəncama əsasən, 2026–2030-cu illərdə müasir standartlara uyğun 21 yeni peşə məktəbinin tikintisi nəzərdə tutulur.
Shimal.News-un məlumatına görə, Milli Məclisin Elm və təhsil komitəsinin üzvü Elçin Mirzəbəyli bildirib ki, Sumqayıt, Abşeron, Gəncə, Daşkəsən, Lənkəran-Astara, Quba-Xaçmaz və Şəki-Zaqatala bölgələrində sənaye potensialının genişlənməsi, aqrar emal sahələrinin artması və turizm imkanlarının yüksəlməsi yeni peşə məktəblərinə tələbatı artırır.
Deputat həmçinin təmsil etdiyi Ağsu rayonunun xüsusi vurğulanmasının tam əsaslı olduğunu qeyd edib:
"Ağsu coğrafi-strateji mövqeyi, logistika imkanları və iqtisadi diversifikasiya potensialına görə ölkənin mərkəzi rayonlarından biridir. Rayon həm Şamaxı–İsmayıllı turizm marşrutunun, həm də Cənub və Aran bölgələrinə uzanan mühüm nəqliyyat qovşağının üzərində yerləşir. Son illərdə kənd təsərrüfatının — xüsusilə bağçılıq, üzümçülük və taxılçılığın — inkişafı müasir aqrotexniki biliklərə malik kadrlara ehtiyacı daha da artırıb. Texniki ixtisaslar üzrə mütəxəssis çatışmazlığı isə istehsal prosesləri, avadanlıqların istismarı və təmiri zamanı çətinliklər yaradır. Bununla yanaşı, Ağsu və ətraf rayonlarda gənc əhalinin artımı, lakin ixtisaslı işçi qüvvəsinin regiondan kənara axını burada peşə təhsil müəssisəsinin yaradılmasını zəruri edir".
Onun sözlərinə görə, Ağsuda müasir peşə məktəbinin açılması həm yerli əmək bazarının, həm də Şamaxı, Qəbələ, Kürdəmir və Göyçay rayonlarını əhatə edən geniş iqtisadi zolağın kadr tələbatını qarşılamağa imkan verəcək. Yeni məktəbdə turizm-servis, aqrotexnologiya, logistika, elektrik təsərrüfatı, avtomatlaşdırma, yol-infrastruktur xidmətləri və digər aktual ixtisasların tədrisi planlaşdırıla bilər.
"Ümumilikdə, 21 yeni peşə məktəbinin yaradılması Azərbaycanın iqtisadi modernləşməsi, qeyri-neft sektorunun inkişafı və regionların ixtisaslı kadr ehtiyacının təmin olunması baxımından strateji əhəmiyyət daşıyır. Bu kontekstdə Ağsu kimi rayonların prioritet ərazilər siyahısına daxil edilməsi həm real tələb, həm də sosial-iqtisadi inkişaf baxımından tam əsaslandırılmış addımdır", – deyə deputat bildirib.
