Yay mövsümünün yaxınlaşması ilə Azərbaycanın turizm bölgələrində kirayə ev və bağ evlərinin qiymətlərində ciddi artım müşahidə olunur.
Milli.Az-ın məlumatına görə, xüsusi ilə Quba, Qusar, Qəbələ, Şəki, İsmayıllı, Nabran və Lənkəran kimi istirahət zonalarında günlük və aylıq kirayə qiymətləri son həftələrdə xeyli yüksəlib.
Mütəxəssislərin sözlərinə görə, may ayının sonundan başlayaraq bölgələrə turist axınının artması kirayə bazarına birbaşa təsir edir. Bu səbəbdən ev sahibləri qiymətləri mərhələli şəkildə artırırlar.
Hazırda bəzi rayonlarda sadə bağ evlərinin günlük kirayə qiyməti 80-100 manatdan başlayır. Daha komfortlu, hovuzlu və dağ mənzərəli kotteclərdə isə qiymətlər 300-500 manata qədər yüksəlir. Bayram və həftəsonu günlərində isə qiymətlərin daha da artdığı bildirilir.
Əmlak bazarı üzrə ekspertlər hesab edirlər ki, bahalaşmanın əsas səbəbi tələbatın artması və təklifin bunu tam qarşılamamasıdır. Hotellərdə qiymətlərin yüksəlməsi də turistlərin fərdi ev və bağ evlərinə üstünlük verməsinə səbəb olur.
Turizm şirkətləri bildirirlər ki, bu il ötən illərlə müqayisədə erkən rezervasiyaların sayı da artıb. Artıq bəzi məşhur istirahət məkanlarında iyun və iyul ayları üçün evlərin bir hissəsi bron edilib.
Mütəxəssislər vətəndaşlara yay mövsümündə yüksək qiymətlərlə qarşılaşmamaq üçün əvvəlcədən rezervasiya etməyi tövsiyə edirlər.
