Bu günədək Zaqatalada istehsalçılardan 1382 tona yaxın yaş tütün qəbul edilib.
AZƏRTAC-ın məlumatına görə, Yaponiyanın “Tet İnternational Development” şirkətinin törəmə müəssisəsi olan “Zaqatala AGRO Industry” MMC tütün kütləsini tədarük edir.
Bildirilib ki, şirkət tərəfindən bu il Zaqatala, Qax və Şəki rayonlarında 214 hektar sahədə “Virciniya botaniki” növlü tütün əkilib. Tütün istehsalı ilə əlaqədar həmin rayonlarda 22 fermerlə müqavilə bağlanılıb. Fermerlərlə bağlanılan müqavilələr üzrə tütün əkilən sahə 154 hektar təşkil edir. Eyni zamanda, şirkət tərəfindən də bu il şimal-qərb bölgəsində 60 hektar sahədə tütün əkilib.
Qax rayonundan fermer Mehman Əhmədov indiyədək qəbul məntəqəsinə 128 ton, Fazil Dursunov 100 ton, Mahir Abdullayev 69,7 ton, Həsən Abdullayev 69,4 ton, Zaqatala rayonundan Rahib Kələşov 97,9 ton, Məftun İsmayılov 48,5 ton, Məcid Əlisoltanov 47,2 ton yaş tütün təhvil veriblər. Şirkətin özü tərəfindən əkilən tütün sahələrindən isə indiyədək 463 ton yaş tütün yığılıb.
Yaş tütünün hər kiloqramına görə fermerlərə I növ üzrə 35 qəpik, II növ üzrə 27 qəpik, III növ üzrə isə 20 qəpik ödənilir.
Cəmiyyətdən verilən məlumata görə, indiyədək emal məntəqəsində 207 ton quru tütün istehsal edilib.
