Xudat şəhərində və ətraf ərazilərdə fəaliyyət göstərən fermer və aqrobiznes sahibləri üçün dövlət xidmətlərinə çıxış daha da asanlaşacaq.
Shimal.News xəbər verir ki, "Xaçmaz KOB evi"nin Xudat Xidmət Mərkəzində yerləşən "Foodcity Aqroparkı"nda Kənd Təsərrüfatı Nazirliyinin xidməti masası fəaliyyətə başlayıb.
Yeni xidmət masasının yaradılmasında əsas məqsəd aqrar sahədə çalışan sahibkarlara operativ və əlçatan xidmət göstərmək, subsidiya müraciətlərini sürətləndirmək və fermerlərin məlumatlandırılmasını genişləndirməkdir.
Bildirilib ki, xidmət masasında kənd təsərrüfatı subsidiyaları ilə bağlı müraciətlərin qəbulu, ilkin məsləhət və digər dəstək xidmətləri həyata keçiriləcək.
Yeni imkan xüsusilə Xaçmaz rayonunun Xudat və ətraf kəndlərində yaşayan fermerlərin işini xeyli asanlaşdıracaq. Belə ki, vətəndaşlar artıq subsidiya və digər aqrar xidmətlər üçün rayon mərkəzinə getmədən müraciətlərini birbaşa Xudatda edə biləcəklər.
Məlumata görə, bu ilin yanvar-aprel aylarında "Xaçmaz KOB evi"nin Xudat Xidmət Mərkəzi tərəfindən sahibkarlara 18 minə yaxın xidmət göstərilib.
Qeyd edək ki, hazırda KOB evləri Bakı, Gəncə, Xaçmaz, Yevlax və Şuşa şəhərlərində fəaliyyət göstərir.
