Bu həftə “Xızı–Abşeron” Külək Elektrik Stansiyasının tikinti meydançasında ilk turbin quraşdırılacaq.
Xalqqazeti.az-ın məlumatına görə, bu barədə yerli mətbuata müsahibəsində “ACWA Power” şirkətinin baş icraçı direktoru Marko Arçelli bildirib.
Bərpaolunan enerji sahəsində dünya lideri olan “ACWA Power”in deyib ki, şirkət Azərbaycanda 400 min evi elektrik enerjisi ilə təmin edəcək 140 meqavat gücündə böyükmiqyaslı qurudakı külək elektrik stansiyası layihəsi üzərində işləyir. Baş icraçı direktorun sözlərinə görə, artıq layihə son maliyyə hesablarının bağlanışına çatıb və bir qədər əvvəl tikinti işlərinə başlanılıb.
Xatırladaq ki, “Xızı–Abşeron” layihəsi Azərbaycanın Energetika Nazirliyi ilə Səudiyyə Ərəbistanı Krallığının “ACWA Power” şirkəti arasında külək enerjisi sahəsində əməkdaşlığa dair Anlaşma Memorandumunun imzalanması ilə reallaşdırılır. Sözügedən sənədə əsasən, 240 meqavatlıq külək qurğusunun tikintisi Səudiyyə Ərəbistanı şirkətinə həvalə olunub. Ötən müddətdə layihənin reallaşdırılmasına 300 milyon ABŞ dolları ayrılıb. Bu isə Səudiyyə Ərəbistanı şirkətinin öz ölkəsindən kənarda yatırdığı ən böyük investisiyasıdır.
“Xızı–Abşeron” Külək Elektrik Stansiyasının təməli isə 2022-ci il yanvarın 13-də Prezident İlham Əliyevin və Səudiyyə Ərəbistanı Krallığının energetika naziri, şahzadə Əbdül Əziz bin Salman Əl-Səudun iştirakı ilə qoyulub. İlkin hesablamalara görə, stansiyada ildə 1 milyard kilovat-saat elektrik enerjisi istehsal olunacaq. Bu isə il ərzində 220 milyon kubmetr təbii qaza qənaət etməyə, 400 min tondan artıq karbon emissiyasının atmosferə atılmasının qarşısını almağa imkan verəcək.
Stansiya Azərbaycanın ilk, Qafqaz bölgəsinin isə ən böyük külək enerjisi istehsal edən qurğusu olacaq. Müqayisə üçün qeyd edək ki, hazırda ölkəmizdə ən böyük külək elektrik stansiyası Xızı rayonunun ərazisində yerləşən 50 meqavat gücündə olan “Yeni Yaşma” stansiyasıdır. Burada hər birinin gücü 2,5 meqavat təşkil edən 20 külək turbini quraşdırıldığı halda, “Xızı–Abşeron”da isə hər birinin gücü 6,5 meqavat olan 37 ədəd külək turbini fəaliyyət göstərəcək.
