Xaçmazın təsərrüfatlarında iyun ayından başlayaraq şaftalı və nektarin yığımı aparılır.
AZƏRTAC-ın məlumata görə, hazırda ənənəvi bağlardan şaftalının “Zalatoy”, “Fədai” növləri və nektarinin tezyetişən sortları yığılır.
Bağlardan toplanan məhsulun bir hissəsi yerli və paytaxt bazarlarında satılır. Şaftalının böyük hissəsi isə qonşu ölkə Rusiyaya göndərilir.
Xaçmaz rayonunun Çiləgir kəndindən olan təsərrüfatçı Coşqun İsmayılov bildirir ki, bu il məhsuldarlıq yüksək olsa da, ötən illərə nisbətən meyvənin alıcılıq qabiliyyəti aşağı düşüb:
“Hazırda qiymət münasibdir. Şaftalının ölçüsündən və keyfiyyətindən asılı olaraq bir kiloqramı 0,7 – 1 manat arasında dəyişir. Amma ötən illərə nisbətən ənənəvi bağlarda becərilən şaftalının alıcılıq qabiliyyəti aşağıdır. İxraca daha çox intensiv bağlarda becərilən xarici sort şaftalı göndərilir”.
Şaftalı bağlarında məhsul yığımı vaxtında aparılmalıdır. Bəzən bir gün gecikmək tonlarla məhsulun zay olması ilə nəticələnə bilər.
“Xüsusilə “Zalatoy” növü ağacda məhv ola bilər. Gilasın məhsuldarlığı bu il hava şəraiti ilə əlaqədar zəif oldu. Amma şaftalı və fındıq yaxşıdır. İndi qalır bol məhsulu vaxtında ağacdan toplayıb, sərfəli qiymətə satmaq”, - deyə Coşqun İsmayılov bildirib.
Xaçmaz ərazisində, ümumilikdə, 3 min hektara yaxın şaftalı bağı var. Həmin bağlardan 1000 hektara yaxını intensiv bağlardır. Hər il şaftalı bağlarında orta məhsuldarlıq 30 sentnerə yaxın olur. Xaçmaz bağlarından il ərzində 7-8 min ton şaftalı toplanır.
