Kənd təsərrüfatı naziri Məcnun Məmmədov Xaçmaz rayonuna səfər edib. Bu haqda ShimalNews 2 iyul tarixində xəbər verir.
Nazir Alıcıqışlaq kəndində taxıl biçininin təşkili prosesini izləyib və yerli fermerlərlə görüşüb. Müzakirələr zamanı taxılçılığın inkişafı, düzgün toxum seçimi, gübrə normaları, taxıl əkinlərində aqrotexniki qulluq qaydalarına riayət etmək, yeni becərmə üsulları, dövlət dəstəyi mexanizmləri və digər mövzular ətrafında fikir mübadiləsi aparılıb.
Aqrar sahənin inkişafı ilə bağlı fermerlərin təklifləri qeydə alınıb, qaldırılan məsələlərin həlli üçün tapşırıqlar verilib.
“Azərbaycan-Türkiyə Toxum Araşdırma Ortaq Müəssisəsi”nin rəhbəri İmamhüseyn Şirinov biçin aparılan 28 ha sahədə “Qobustan” buğda sortunun əkildiyini, sahədən orta hesabla 44-46 sentner məhsul gözlədiklərini bildirib.
Bu il Xaçmaz rayonunda 18.942 ha payızlıq taxıl əkilib. Onun 12.029 ha buğda, 6.913 ha arpa sahələri təşkil edir. Rayonda biçin prosesində 48 kombayn iştirak edir. Bunlardan 28-i fiziki və hüquqi şəxslərin mülkiyyətində olan kombaynlardır. Qalan texnika isə “Aqroservis” ASC-yə aiddir.
Artıq rayon üzrə zəmilərin 8.570 ha biçini yekunlaşıb, sahələrdən 25.126,5 ton məhsul yığılıb. Taxıl üzrə orta məhsuldarlıq 29.3 sentner təşkil edir.
