Elm və Təhsil Nazirliyinin Coğrafiya İnstitutunda aparılan yeni tədqiqatda Azərbaycanın Xəzərsahili bölgələrinin siyasi-coğrafi problemləri araşdırılıb. Tədqiqat zamanı xüsusilə Xaçmaz, Siyəzən və Şabran rayonlarında mövcud təhlükəsizlik məsələlərinə diqqət yetirilib.
Coğrafiya elmləri doktoru, dosent Nəriman Paşayevin verdiyi məlumata görə, araşdırmanın məqsədi Xəzərsahili regionların Azərbaycanın iqtisadi inkişafı, enerji təhlükəsizliyi və beynəlxalq nəqliyyat-logistika sistemindəki strateji rolunu qiymətləndirmək olub.
Tədqiqat çərçivəsində Bakı, Sumqayıt, Siyəzən, Şabran, Xaçmaz, Neftçala, Salyan, Lənkəran və Astara rayonlarının mövcud vəziyyəti təhlil edilib. Bildirilib ki, bu ərazilər ölkənin sənaye, neft-qaz, nəqliyyat və turizm potensialında mühüm yer tutur.
Araşdırmada Xaçmaz, Siyəzən və Şabranın da daxil olduğu şimal rayonlarında sərhəd təhlükəsizliyi və qaçaqmalçılıq risklərinin əsas problemlərdən biri olduğu vurğulanıb. Müəlliflər bu məsələlərin regionun təhlükəsizliyi və dayanıqlı inkişafı baxımından xüsusi diqqət tələb etdiyini qeyd ediblər.
Bununla yanaşı, Xəzər dənizinin hüquqi statusu, Aktau Konvensiyasının əhəmiyyəti, Bakı-Tbilisi-Ceyhan və Cənub Qaz Dəhlizi kimi strateji enerji marşrutlarının təhlükəsizliyi, Orta Dəhlizin tranzit imkanları, eləcə də Xəzəryanı dövlətlər arasında geosiyasi rəqabət də araşdırmada geniş təhlil olunub.
Sonda Azərbaycanın Xəzər regionunda dayanıqlı inkişafının təmin edilməsi üçün ekologiya, enerji, logistika və sosial siyasət istiqamətində həyata keçirilməsi vacib hesab olunan tədbirlər barədə təkliflər irəli sürülüb.
Mənbə: AZƏRTAC
