Xaçmazın Çarxı kəndində yeni quşçuluq fabriki inşa edilir. Bu barədə ShimalNews 26 aprel tarixində RİH-yə istinadən məlumat verir.
Bu, “Aztoyuq” MMC-nin 10 milyon manata yaxın investisiya qoyulmuş layihəsidir. Fabrikdə hər biri 2160 kv.m olmaqla ümumilikdə 20 ədəd quş saxlama damları tikilir. Burada illik yem istehsalı 14 min ton, quş əti istehsalı isə 6600 ton olacaq. Kəsim kompleksi saatda 2500-3000 baş toyuq istehsal edəcək.
İcra başçısı Elnur Rzayev buradakı işlərin gedişi ilə tanış olub. Bildirilib ki, burada ilkin mərhələdə 240 nəfər işlə təmin olunacaq. Sex və sahələr genişləndirildikdən sonra işçilərin də sayı artırılacaq.
Prezident İlham Əliyevin tapşırıqlarına uyğun olaraq, Xaçmaz rayonunda əhalinin məşğulluğunun təmin olunması və yeni iş yerlərinin açılması istiqamətində ardıcıl tədbirlər həyata keçirilir.
“Aztoyuq” MMC-nin quşçuluq fabrikinin 40 hektara yaxın torpaq sahəsi var. Kompleksin 2024-cü ilin əvvəlində fəaliyyətə başlayacağı planlaşdırılıb.
