Xaçmazda son illər xeyli artan gilas bağlarında yığımın qızğın çağıdır. Bu haqda ShimalNews 12 iyun tarixində “Azərtac”a istinadən məlumat verir.
“Mayın 22-dən məhsul yığımına başlamışıq. Bu ağaclarda məhsul ötən ilə nisbətən az olsa da, təmizdir. Ötən il məhsulumuzun 50-60 %-i yağışlar səbəbindən çürümüşdü. Toplanan məhsulu çeşidləyib soyuducu anbarlara təhvil veririk. Oradan isə Rusiyaya göndərilir. Qiymətlər məhsulun növünə və keyfiyyətinə görə dəyişir. Bir kiloqramı 2 manatdan 7 manatadək dəyişir. Məsələn, “Romanovka” gilasının bir kiloqramı 6-7 manatdır. İndi yığdığımız “Krım” növüdür. Əvvəl 4 manat idi qiyməti, indi 3 manata kimi ucuzlaşıb. Məhsul çoxaldıqca qiymət də ucuzlaşır. Amma hazırkı qiymətlər bizi qane edir”, - deyə Mürşüdoba kəndindən olan təsərrüfatçı Elvin Ağayev bildirib.
Toplanan məhsulun 80-90 faizi qonşu Rusiya Federasiyasının bazarlarına göndərilir. Fermerlər bu giləmeyvəni digər xarici bazarlara da ixrac etmək imkanının olduğunu deyirlər.
