TƏBİB tabeliyində fəaliyyət göstərən xəstəxanalarda çalışan əməkdaşlar əməkhaqlarının gecikdirilməsindən narazıdırlar.
Shimal.News-a daxil olan məlumata görə, Bakı şəhərində, Şimal bölgəsi və eləcə də digər rayonlarda yerləşən dövlət xəstəxanalarında çalışan işçilər mayın 13-ü olmasına baxmayaraq, aprel ayına aid maaşların hələ də ödənilmədiyi iddia olunur.
İşçilərin sözlərinə görə, əmək müqavilələrində maaşların hər ayın 10-dək verilməsi nəzərdə tutulsa da, son dövrlər gecikmələr artıq mütəmadi baş verir.
"Artıq maaşı pensiya kimi verirlər – ayın 15-dən 15-nə qədər gözləyirik", – deyə narazı əməkdaşlar bildiriblər.
Məlumata əsasən, vəziyyət xəstəxanalarda çalışan əməkdaşların arasında ciddi narazılıq yaradıb. Sosial şəbəkələrdə və kollektiv daxilində "TƏBİB maaşları vaxtında ver, həkim xəstə əlinə baxmasın" kimi şüarlar səsləndirilir.
İddia edilir ki, maaş gecikmələri İcbari Tibbi Sığorta üzrə Dövlət Agentliyi sistemində aparılan son dəyişikliklərdən sonra qabarıq şəkildə hiss olunmağa başlayıb.
Narazılıq edən işçilər bildirirlər ki, işə bir neçə dəqiqə gecikdikdə onlardan izahat tələb edilir və əməkhaqlarında kəsintilər olur. Lakin maaşların günlərlə gecikdirilməsinə görə qanunvericilikdə nəzərdə tutulan hər hansı kompensasiya ödənilmir.
Onların sözlərinə görə, gecikən maaşlar kredit öhdəliklərinin vaxtında ödənilməsinə mane olur, əlavə faizlərin yaranmasına səbəb verir və ailələrin sosial vəziyyətinə mənfi təsir göstərir.
Məsələ ilə bağlı TƏBİB və İcbari Tibbi Sığorta üzrə Dövlət Agentliyi tərəfindən hələlik rəsmi açıqlama verilməyib.
