Bu günlərdə soğan satışı ilə məşğul olan fermerlər qiymətin aşağı olmasından giley edirlər. Azərbaycanın bir çox bölgələrində, xüsusilə Şəki–Zaqatala iqtisadi rayonu üzrə mövcud vəziyyət narazılıq doğurur.
Baki-xeber.com-un məlumatına görə, Liberal İqtisadçılar Birliyinin sədri Akif Nəsirli qiymətlərin düşməyinin əsas iqtisadi səbəblərindən birini məhsul bolluğu ilə əlaqələndirib.
Hava şəraiti və subsidiyaların təsiri soğan istehsalını rekord həddə çatdırıb. Daxili tələbat isə sabit qalıb. Kənd təsərrüfatı məhsulları istehsal edənlərin üzləşdikləri problemlərdən biri də yığdıqları məhsulun bazara çıxarılması ilə bağlıdır. Məhsul satışının təşkilində çətinlik çəkənlər bu sahədə fəaliyyət göstərməyə o qədər də meylli olmurlar.
Keçən illə müqayisədə Rusiyaya və Gürcüstana ixracın azalması, eləcə də Mərkəzi Asiya bazarlarında rəqabətin artması (xüsusən Qazaxıstan və Özbəkistandan ucuz soğan təklifi) Azərbaycan məhsulunun ixrac imkanlarını məhdudlaşdırıb.
Bununla yanaşı saxlama infrastrukturunun çatışmazlığı hiss olunur. Fermerlərin əksəriyyəti məhsulu uzun müddət saxlamaq imkanına malik deyil. Soyuducu anbarların azlığı onları məhsulu tez bir zamanda, aşağı qiymətə satmağa məcbur edir.
Digər tərəfdən logistika və vasitəçi problemi mövcuddur. Bazarda əsas gəliri çox vaxt topdan alıcılar və vasitəçilər götürür. Fermerin maya dəyəri yüksəldiyi üçün (yanacaq, işçi qüvvəsi, gübrə və s.), satış qiyməti həmin xərcləri ödəmir.
Ekspert hesab edir ki, kiçik təsərrüfatlar birləşərək kooperativlər şəklində məhsulu birgə toplayıb satarsa, vasitəçilərdən asılılıq və qiymətlərin aşağı düşməsi riski azalacaq.
