SOCAR ilə Gran Tierra Energy Inc. arasında Azərbaycan Respublikasının Quba–Xəzəryanı regionunda yerləşən qurudakı perspektiv sahə üzrə Kəşfiyyat, İşlənmə və Hasilatın Pay Bölgüsü Sazişi (PSA) imzalanıb.
Shimal.News xəbər verir ki, sənədi SOCAR-ın prezidenti Rövşən Nəcəf və "Gran Tierra Energy Inc." şirkətinin prezidenti və baş icraçı direktoru Gary Guidry imzalayıblar.
Sazişə əsasən, layihənin operatoru qismində çıxış edəcək "Gran Tierra Energy Inc." 65 faiz iştirak payına malik olacaq. Geoloji kəşfiyyat proqramı çərçivəsində qravimetrik məlumatların toplanması, 3D seysmik tədqiqatların aparılması və müqavilə sahəsinin karbohidrogen potensialının qiymətləndirilməsi məqsədilə kəşfiyyat quyularının qazılması nəzərdə tutulur.
Sənəd Azərbaycan Respublikasının Milli Məclisi tərəfindən ratifikasiya edildikdən sonra qüvvəyə minəcək.
