Siyəzən rayonunda intensiv meyvə bağlarının salınmasına maraq artıb.
Azertag.az-ın məlumatına görə, son illər rayonda superintensiv meyvə bağlarının sahəsi artırılaraq 275 hektara çatdırılıb. Bu bağların 150 hektarında badam, 90 hektarında zeytun əkilib. Bundan başqa, rayonda intensiv üsulla becərilən 4,6 hektar əncir, 6 hektar heyva, 2 hektar xurma, 0,5 hektar nar və 22 hektar giləmeyvə bağları var.
Siyəzən Dövlət Aqrar İnkişaf Mərkəzindən bildirilib ki, rayonda intensiv meyvə bağlarının salınmasında əsas məqsəd xarici bazarlara çıxarılabilən rəqabətqabiliyyətli məhsul istehsal etməkdir. 2024-cü ildə rayonda 3 hektar badam, 1,25 hektar intensiv qoz bağı salınıb.
Ənənəvi bağlarla müqayisədə superintensiv bağlarda məhsuldarlıq daha yüksəkdir. Bu bağların dərmanlanması və suvarılması prosesi də daha asandır. Bu bağlardan əldə olunan məhsul keyfiyyətli və xarici bazarlarda rəqabətqabiliyyətli olduğu üçün daha çox gəlir gətirir. Buna görə də sahibkarlar yeni intensiv və superintensiv tipli meyvə bağları salmaqda maraqlıdırlar.
Digər tərəfdən intensiv tipli bağlar tez məhsul verməklə yanaşı, həm də xəstəlik və zərərvericilərə qarşı davamlıdır. Ən əsası isə həm xarici, həm də yerli bazarlarda intensiv bağların məhsulu olan meyvələrə tələbat yüksəkdir. Müasir tipli bağların suvarılmasında damlama suvarma sistemindən istifadə olunur. Bu isə suvarma suyuna qənaət etməklə yanaşı, işçi qüvvəsinin də işini xeyli asanlaşdırır.
Hazırda Siyəzən rayonunda, ümumilikdə, 946,3 hektar meyvə və üzüm bağı var.
