Ölkənin şimal rayonlarında alma yığımı sürətlənib, lakin təsərrüfatçılar toplanan məhsulu bazara çıxarmağa tələsmirlər.
"Report"un məlumatına görə, bu il alma boldur, lakin satış qiyməti fermerlərin ürəyincə deyil.
Hazırda bağlardan ənənəvi sortlardan sayılan iri ölçülü qırmızı və ağ palment növü yığılır. İkinci mərhələdə, təqribən 15-20 gündən sonra isə xırda almalar dəriləcək.
Bazarda Quba almasının qiyməti 50-60 qəpik həddində dəyişir. Bölgədə fəaliyyət göstərən emal müəssisələri isə almanın 1 kiloqramını cəmi 6 qəpiyə alır. Bu qiymət isə bağ sahiblərini qane etmir. Mütəxəssislər fermerlərə sərfəli müştəri tapmaq üçün yeni bazarların axtarışına çıxmağı tövsiyə edirlər.
Təsərrüfatı böyük olan fermerlər bağlardan yığdıqları məhsulu soyuducu anbarlara toplayırlar. Soyuducu kamerada məhsulun 1 tonunu bir ay saxlamaq fermerlərə 40 manata başa gəlir. Kiçik fermerlər isə bu xərci ödəyə bilmədikləri üçün məhsulu öz həyətlərində saxlamalı olurlar.
Şimal bölgəsinin alma bağlarında daha çox məhsuldarlığı ilə seçilən “Qolden” və “Simirenko” sortları yetişdirilsə də, intensiv bağçılıqla məşğul olan bağbanlar isə “Qrani smit”, “Fuji” sortlarına üstünlük verirlər.
Bu il Quba rayonunda ümumilikdə 12 min hektar alma bağı mövcuddur. Ötən il bu bağlardan 110 min ton məhsul tədarük edilib. Cari ildə isə bu məhsulun 10-15 faiz çox olacağı gözlənilir.
