Şimal-qərb bölgəsində tütün yığımı mövsümünə başlanılıb. İlk gündə fermerlər tərəfindən emal məntəqələrinə 17,9 ton yaş tütün təhvil verilib.
Shimal.News məlumat verir ki, builki mövsümdə "Azərtütün" ASC tərəfindən Balakən, Zaqatala, Qax, Şəki və Oğuz rayonlarında ümumilikdə 813 hektar sahədə "Virciniya botaniki" növlü tütün əkilib.
Kampaniyanın ilk günündə Balakən rayonunda 8,8 ton, Şəki rayonunda 7 ton, Zaqatala rayonunda isə 2,1 ton yaş tütün yarpağı qəbul olunub.
Bildirilib ki, cari ildə tütün istehsalı ilə bağlı 35 fermerlə müqavilə imzalanıb. Müqavilələr üzrə 390,2 hektar sahədə tütün becərilir. Bununla yanaşı, şirkət tərəfindən bölgədə əlavə 422,8 hektar sahədə tütün əkini aparılıb.
Hazırda təsərrüfatlarda yaş tütün yarpaqlarının yığımı ilə yanaşı, becərmə işləri də davam etdirilir. Sahələrdə suvarma və kultivasiya tədbirləri həyata keçirilir.
