Kənd Təsərrüfatı Nazirliyinin Aqrar Təlim Mərkəzinin Quba şəhərində yerləşən Regional Tədris Mərkəzində "Azərbaycanda trüfel istehsalının təşviqi" layihəsinə dair maarifləndirmə aparılıb.
Shimal.News xəbər verir ki, tədbirdə Quba, Xaçmaz, Siyəzən, Xızı və Şabran rayonlarından fermerlər, sahibkarlar, turizm agentliklərinin nümayəndələri, aqrar sahə üzrə mütəxəssislər və trüfel istehsalına maraq göstərən vətəndaşlar iştirak ediblər.
Seminarda vurğulanıb ki, trüfel istehsalının inkişafı kənd təsərrüfatının şaxələndirilməsi, yüksək əlavə dəyərli ixrac məhsullarının istehsalı, aqroturizmin inkişafı, yeni iş yerlərinin yaradılması və regionların sosial-iqtisadi inkişafı üçün mühüm imkanlar yaradır.
Üstəlik trüfel göbələkləri palıd, fındıq, vələs, Şərq fıstığı, cökə, qovaq və söyüd kimi ağacların kök sistemi ilə mikoriza əlaqəsi yaradaraq onların inkişafına, qida maddələrinin mənimsənilməsinə və torpağın bioloji aktivliyinin artmasına müsbət təsir göstərir.
Qeyd edək ki, layihə çərçivəsində növbəti seminarların Şəki və Qəbələ rayonlarında təşkili planlaşdırılır.
Trüfel (donbalan) göbələyi dünyanın ən qiymətli qida məhsullarından biri hesab olunur. Bənzərsiz ətri və ləzzəti səbəbindən mətbəxdə "qara almaz" olaraq da adlandırılır. Çox dərində bitdiyi və yetişdirilməsi çətin olduğu üçün olduqca bahadır.
