Xızı, Quba və Ağsu rayonlarında torpaq sahələrinin satışı və icarəsi ilə bağlı yeni hərrac və müsabiqələr elan olunub.
Shimal.News xəbər verir ki, iyunun 24-də keçiriləcək hərraclarda kənd təsərrüfatı, heyvandarlıq, sahibkarlıq və fərdi yaşayış evi tikintisi üçün nəzərdə tutulan torpaq sahələri satışa və uzunmüddətli icarəyə çıxarılacaq.
Ən diqqətçəkən lotlardan biri Giləzi bələdiyyəsinə aid torpaqlardır. Belə ki, Sitalçay kəndi ərazisində yerləşən 15 hektarlıq torpaq sahəsi 15 illik icarəyə heyvandarlıq məqsədilə təqdim olunub. İlkin qiymət 810 manat müəyyənləşdirilib.
Bundan başqa, Giləzinin Şorabad kəndində yerləşən 2 hektarlıq torpaq sahəsi də heyvandarlıq məqsədilə 15 illik icarəyə çıxarılıb. Həmin ərazi üçün ilkin qiymət 108 manatdır.
Quba rayonunun Birinci Nügədi bələdiyyəsində yerləşən 2,48 hektarlıq torpaq sahəsi isə kənd təsərrüfatı istehsalı üçün 15 illik icarəyə təqdim olunub. Sahənin ilkin qiyməti 322 manat təşkil edir.
Ağsu rayonunun Kalva bələdiyyəsində yerləşən 2 hektarlıq torpaq sahəsi də heyvandarlıq məqsədilə 15 illik icarəyə çıxarılıb. Həmin ərazi üçün ilkin qiymət 442 manat müəyyən olunub.
Qeyd edək ki, hərraclar Əmlak Məsələləri Dövlət Xidmətinin regional şöbələrində təşkil ediləcək.
