Quba-Xaçmaz iqtisadi rayonunun turizm potensialı böyükdür və bu potensialın artırılması regionun iqtisadiyyatına əhəmiyyətli töhfələr verə bilər. Bu ərazi həm təbii gözəllikləri, həm də zəngin mədəni irsi ilə diqqət çəkir. Xüsusilə, Nabran kəndi və ətrafı, dənizkənarı istirahət zonası kimi, illərlə turizm cəlbediciliyini qoruyub və regionda yüksək mövqelərə sahib olub. Lakin bu ərazidə turizmin inkişafı bəzi çətinliklərlə qarşılaşır, ən böyük maneələrdən biri isə qiymətlərin baha və azbüdcəli turizm imkanlarının məhdud olmasıdır.
"Azərbaycan Turizm Peşəkarları Təşkilatı" İctimai Birliyinin sədri Ceyhun Aşurov Shimal.News-a bildirib ki, Nabranda böyük hotellərin tikilməsinə və sayının artırılmasına ehtiyac var:
“Quba-Xaçmaz iqtisadi zonası paytaxta yaxın olduğuna görə insanlarımız istirahət üçün daha çox bu regiona üstünlük verirlər. Əlbəttə ki, hotellərin, azbüdcəli qalma yerlərinin çox az olması qiymətlərin vətəndaşlar üçün baha olmasına gətirib çıxarır. Düşünürəm ki, kənd evlərinin sayı artırılmalı, kiçik və orta sahibkarlara xüsusi təşviqlər olmalıdır”.
Ekspert vurğulayıb ki, azad bazar iqtisadiyyatı dövründə dövlətin qiymətlərə müdaxilə etməsi, qiymət müəyyən etməsi doğru deyil: “Dövlətin vəzifəsi sahibkarlara şərait yaratmaq, rəqabət mühitini formalaşdırmaqdır. Daha çox sahibkarın cəlb edilməsi, hətta mikro sahibkarların evləri təmir edib turistlərə təklif etməsi qiymətlərdə müəyyən tarazlayıcı funksiyanı yerinə yetirmiş olacaq”.
Sonda qeyd edək ki, dünya təcrübəsində turizm zonalarında mövcud olan kiçik hotellər və “guest house”lar (qonaq evləri) turizmin əlçatanlığını artıran əsas məkanlar olur. Dövlət bu kiçik müəssisələrə vergi güzəştləri, kreditlər, təlimlər və marketinq dəstəyi göstərərək onların inkişafı üçün şərait yarada bilər. Eyni zamanda, yerli sakinlərin öz evlərini qonaq evlərinə çevirməsi üçün də dövlət tərəfindən təlimlər və bələdçi xidmətləri təqdim oluna bilər.
Zaur Mirzə
