Cari ildə Balakən, Zaqatala, Qax və Şəki rayonlarında fəaliyyət göstərən tütün istehsalı və emalı məntəqələrinə fermerlərdən 6 min 755 ton yaş tütün daxil olub.
AZƏRTAC-ın məlumatına görə, “Azərtütün” ASC ilə müqaviləsi olan respublikanın şimal-qərb rayonlarının tütünçülük təsərrüfatlarında yaş tütün yarpağının yığımı davam edir.
Builki mövsümdə cəmiyyət tərəfindən Balakən, Zaqatala, Qax, Şəki və Oğuz rayonlarında 868,7 hektar sahədə “Virciniya botaniki” növlü tütün əkilib. Bunun 446 hektarı şirkətin özünə, 422,7 hektarı isə fermerlərə məxsus sahələrdir. Tütün istehsalı ilə əlaqədar 50 fermerlə müqavilə bağlanıb.
Bu günədək emal məntəqələri Şəki rayonu üzrə istehsalçılardan 2 min 962 ton, Zaqatala rayonu üzrə 1943 ton, Qax rayonu üzrə 931 ton, Balakən rayonu üzrə 878 ton, Oğuz rayonu üzrə isə 41 ton yaş tütün kütləsi qəbul edib. Eyni zamanda, indiyədək emal məntəqələrində yaş tütündən 610,4 ton quru tütün istehsal olunaraq anbarlara yığılıb.
Hazırda bu rayonlardakı tütün istehsalı və emalı məntəqələrində, ümumilikdə, 262 tütünqurutma kamerası var. Bu kameraların üstün cəhəti odur ki, yaşıl tütün kütləsi sahələrdən birbaşa məntəqəyə gətirilir və qurudulmaq üçün kameralara qoyulur.
