Xaçmaz, Quba və Qusar rayonlarında buğda, arpa, kartof və tərəvəz bitkilərinin toxumlarının, eləcə də tinglərin istehsalı və sertifikatlaşdırılmasına dair nəzəri-praktik təlim keçirilib. Bu haqda ShimalNews 2 avqust tarixində məlumat verir.
Tədbir Kənd Təsərrüfatı Nazirliyi Yanında Aqrar Xidmətlər Agentliyinin və FAO-nun Azərbaycan nümayəndəliyinin təşkilatçılığı ilə baş tutub.
Təlimdə Türkiyə Respublikasının Kənd Təsərrüfatı Nazirliyinin Toxum Qeydiyyatı və Sertifikatlaşdırma Mərkəzinin rəhbəri Şakir Bektaş və həmin mərkəzin əməkdaşı Mustafa Kızmaz iştirak ediblər. Onlar tərəfindən Aqrar Xidmət Agentliyinin əməkdaşlarına toxum və tinglərin sertifikatlaşdırma proseləri ilə bağlı ətraflı məlumat verilib və iştirakçıları maraqlandıran suallar cavablandırılıb.
Daha sonra Quba və Qusar rayonlarında kartof toxumu və ting istehsalı ilə məşğul olan təsərrüfatlara səfər təşkil olunub. Sahələrdə aprobasiya zamanı diqqət olunacaq əsas məqamlar mütəxəssislərə bildirilib.
Təlim zamanı türkiyəli mütəxəsislər Xaçmaz rayonunda yerləşən Dövlət Toxum Fondunun Toxum Emalı Zavodunda və özəl toxumçuların təsərrüfatlarında toxumtəmizləmə və emal prosesləri ilə tanış olub, müvafiq məsləhətlər veriblər.
