Dövlət İmtahan Mərkəzi tərəfindən Zaqatala, Balakən, Qax rayonlarında və Şəki şəhərində dövlət qulluqçuları üçün təlimlər təşkil olunub.
Shimal.News xəbər verir ki, təlimlərdə "Ünsiyyət bacarıqlarının inkişafı", "Dövlət qulluğunda vakant inzibati vəzifələrin idarə edilməsi" və "Cəmiyyətə xidmət psixologiyası: dövlət qulluqçusunun daxili motivasiyası" mövzuları üzrə iştirakçılara məlumat verilib. Təlimlər çərçivəsində müzakirələr aparılıb, iştirakçıların sualları cavablandırılıb.
Bildirilib ki, bu cür təlimlərin ilin sonunadək digər şəhər və rayonlarda da davam etdirilməsi planlaşdırılır.
Qeyd edək ki, bu təşəbbüs Azərbaycan Respublikasının 2022–2026-cı illərdə sosial-iqtisadi inkişaf Strategiyası çərçivəsində həyata keçirilir və müvafiq sənədə əsasən Dövlət İmtahan Mərkəzi əsas icraçı qurum kimi müəyyən edilib.
