Azərbaycanın ətir sənayesi sahəsində ixtisaslaşmış “Lecheq Farm & Distillery” şirkəti Fransa Ətriyyatçılar Cəmiyyətinin təşkilatçılığı ilə keçirilən ətir sənayesi üçün xammal və xidmətlərə həsr olunan peşəkar XVIII “SİMPPAR” Beynəlxalq Ətriyyat Sərgisində təmsil olunub.
AZƏRTAC-ın məlumatına görə, Parisdə XVIII “SİMPPAR” Beynəlxalq Ətriyyat sərgisində 120-dən çox ətriyyat sənayesi üçün xammal istehsal edən şirkət iştirak edir.
“Lecheq Farm & Distillery” şirkəti sərgidə təbii məhsullardan hazırlanmış müxtəlif çeşidli bitki yağları, kosmetika və aromaterapiya üzrə məhsullarını nümayiş etdirir. Azərbaycanın əsrarəngiz diyarlarında - Zaqatala və Şəkidə becərilmiş qızılgül, lavanda və digər çöl çiçəklərindən hazırlanmış aroma yağları ətir istehsalçılarının diqqətini cəlb edib. Hətta bəzi mütəxəssislər Azərbaycan lavandası yağının xüsusi ətir nüansına malik olduğunu, digər ölkələrdən gələn lavanda yağlarının ətrindən tamamilə fərqləndiyini bildirirlər. Azərbaycandan gələn bitki yağlarının belə təkrarolunmaz ətrə malik olmasını ölkənin iqlimi və torpağı ilə əlaqələndiriblər. Müxtəlif ölkələrdən gəlmiş ətirşünaslar Azərbaycandan gələn bitki yağlarının unikal olduğunu söyləyirlər.
SİMPPAR beynəlxalq sərgi salonu tanınmış ətir istehsalçıları ilə ətriyyat sənayesi üçün xammal və xidmətlər təklif edən şirkətlərin ən məşhur görüş yeridir.
“Lecheq Farm and Distillery” şirkətinin dünyada tanınmış və aparıcı kosmetika, aromaterapiya sənayelərinin təbii xammal tədarükçüsünə çevrilməsi təsadüfi deyil. Azərbaycanda hələ ötən əsrlərdən qızılgül yağı istehsal olunub.
Sərgi iyunun 6-dək davam edəcək.
