Şimal bölgəsinin kəndlərinə investorların marağı bir neçə əsas amildən asılı olaraq dəyişir. Bu marağın artırılması və davamlı inkişafı üçün müxtəlif iqtisadi, sosial və coğrafi faktorlar rol oynayır. Şimal bölgələri böyük şəhərlərə nisbətən daha ucuz torpaq qiymətləri və tam inkişaf etməmiş infrastrukturu ilə cəlbedici ola bilər. Bu regionlarda nəqliyyat əlaqələrinin inkişafı, elektrik və su təminatı, internet xidmətlərinin təkmilləşdirilməsi investorlar üçün əlavə fürsətlər yaradır. Şimal bölgəsinin kəndlərinə sərmayə yatırılması həm də yerli iqtisadiyyatı gücləndirir.
Bəs görəsən, Qusarın Ləzə kəndində hazırda daşınmaz əmlak qiymətləri necədir? Ümumiyyətlə, investorların şimal bölgəsinin kəndlərinə sərmayə qoymağa marağı hansı səviyyədədir?
Mövzu ilə bağlı Shimal.News-a açıqlama verən Milli Məclisin 61 saylı Qusar seçki dairəsinin deputatı Azər Badamovun sözlərinə görə, Qusarın Ləzə kəndi turizm baxımından cəlbedici məkandır:
“Ona görə də bu ərazidə daşınmaz əmlak kifayət qədər baha qiymətə təklif edilir. Amma bununla yanaşı turizm sahəsində fəaliyyət göstərmək istəyən investorlar üçün daşınmaz əmlak almaq imkanları həmişə var. Həm də Ləzə kəndinin inzibati ərazisində kifayət qədər turizm obyektləri tikilib və tikilir. Yəni, investisiya qoymaq istəyən investorlar üçün heç bir məhdudiyyət yoxdur”.
İqtisadçı ekspert Eldəniz Əmirov qeyd edib ki, Azərbaycanın regionlarının böyük əksəriyyəti kifayət qədər investisiya potensialına malikdir:
“Şimal bölgəsi belə bir potensialı özündə cəmləşdirir. Bunun bir neçə səbəbi var. Birinci səbəb bölgənin coğrafi mövqeyi ilə bağlıdır. Coğrafi mövqe kifayət qədər logistika imkanlarına malikdir. Şimal- cənub nəqliyyat dəhlizi çərçivəsində həm dəmiryolu, həm də avtomobil yollarının inkişafına investisiya üçün əlverişli şərait var.
Digər bir istiqamət kimi kənd təsərrüfatı və aqrobiznes imkanlarını qeyd edə bilərik. Burada bilavasitə meyvəçilik və tərəvəzçilik, eyni zamanda aqrar sahənin məhsullarına əsaslanan, yəni, xammal olaraq aqrar sahədən istifadə edən emal sənayesinin inkişaf etdirilməsi üçün ciddi potensial var. Həm meyvə-tərəvəzin emalı, həm də onların qablaşdırılması nəzərdə tutulur. Düşünürəm ki, regionun məhsullarının keyfiyyət göstəriciləri kifayət qədər üst səviyyədədir. Bu da ixrac potensialının daha da artırılmasına xidmət edir”.
“Şimal bölgəsinin eyni zamanda turizm potensialı kifayət qədər yuxarı səviyyədədir. Burada ekoturizm, dəniz, mədəni və dağ turizminin qolları var. Bu qollar daha da inkişaf etmək potensialına malikdir. Həm də bölgənin paytaxtla yaxın məsafədə yerləşməsi turizm potensialını artırır.
Məhsulların ölkədaxili paylanması üçün region yaxşı coğrafi mövqedə yerləşir.
Şimal bölgəsinin insanları da düşünürəm ki, istər kənd təsərrüfatı, istərsə də emal sənayesi üzrə kifayət qədər təcrübəlidirlər. Ümumilikdə ölkə üzrə kiçik və orta biznes subyektlərinin regionlar üzrə bölgüsünə baxsaq, görərik ki, ən yuxarı paya sahib bölgələrdən biridir. İnsanlarda ruhən sahibkarlıq ruhu müşahidə edilir. Bu da bölgənin ciddi bir resursu olaraq qəbul edilməlidir”, - deyə E.Əmirov fikrini tamamlayıb.
Nəzrin Vahid
