Şəki-Zaqatala bölgəsində arıçılığın inkişafına yönəlmiş yeni layihənin icrasına başlanılıb.
Shimal.News xəbər verir ki, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi "BP Azerbaijan" şirkəti ilə birgə proqramı çərçivəsində "Balans" İqtisadi Maarifləndirmə İctimai Birliyi tərəfindən "Şəki-Zaqatala regionunda meşə arıçılığının inkişafına dəstək" layihəsi həyata keçiriləcək.
Layihə rəhbəri Möhübbəli Nağıyev bildirib ki, təşəbbüsün əsas məqsədi biomüxtəlifliyin qorunmasına dəstək vermək, eyni zamanda Şəki-Zaqatala bölgəsində meşə arıçılığının inkişafına töhfə göstərməkdir.
Onun sözlərinə görə, Şəki-Zaqatala iqtisadi rayonu zəngin meşə ehtiyatları və əlverişli təbii şəraiti ilə arıçılıq üçün ölkənin ən perspektivli bölgələrindən hesab olunur. Hazırda minlərlə ailə təsərrüfatı bu sahədən gəlir əldə edir.
Layihə çərçivəsində fermerlər, təsərrüfat rəhbərləri, arıçılığa yeni başlamaq istəyən şəxslər, xüsusilə qadınlar və gənclər üçün dörd təlim keçiriləcək. Təlimlərdə arıçılıq təsərrüfatlarının yaradılması, arı xəstəlikləri ilə mübarizə, məhsulların brendləşdirilməsi və satış imkanları barədə məlumat veriləcək.
Bundan əlavə, iştirakçıların bölgənin tanınmış arıçıları ilə görüşləri təşkil olunacaq, meşə arıçılığının ekologiyaya və kənd təsərrüfatına təsiri barədə maarifləndirici sessiyalar keçiriləcək.
Layihəyə ümumilikdə 25 nəfərin cəlb olunması nəzərdə tutulur.
