Qusarda yerləşən “Şahdağ Turizm Mərkəzi”nin zərərinin azaldılması ilə bağlı daxili strateji yol xəritəsi hazırlanıb. Bu barədə ShimalNews 29 iyun tarixində Dövlət Turizm Agentliyinə istinadən məlumat verir.
QSC-nin İdarə Heyətinin sədri Rüstəm Nəcəfovun sözlərinə görə, əsas hədəf qısa müddət ərzində mənfəətə keçməkdir:
"Bu məsələlər investisiyalardan asılıdır. 2024-cü ildə "Şahdağ Turizm Mərkəzi”nin ərazisində yeni hotel fəaliyyətə başlayacaq. Bundan başqa, beynəlxalq, dünya kuboku səviyyəli yarışların keçirilməsi üçün (xizək yarışları üzrə) gələn həftədən xüsusi kanat yolu və yamac yolunun tikintisinə başlanılacaq. Bunu nəzərə alsaq, yüklülüyümüz artır, ancaq biz gəlirliliyimizi artırmağa çalışırıq".
Dövlət Turizm Agentliyinə məxsus "Şahdağ Turizm Mərkəzi" 2022-ci ili 8 milyon 688 min manat xalis zərərlə başa vurub. Şirkət 2021-ci ili 6 milyon 344 min manat xalis zərərlə bağlamışdı. Beləliklə, ötən il "Şahdağ Turizm Mərkəzi"nin xalis zərəri 2 milyon 344 min manat və ya 37% artıb.
