Şabran rayonunda keçirilən əmək yarmarkasında işaxtaran vətəndaşlara 100 vakant iş yeri təklif edilib.
Shimal.News xəbər verir ki, Dövlət Məşğulluq Agentliyinin Quba-Xaçmaz Regional Məşğulluq filialının təşkilatçılığı ilə baş tutan yarmarkada 14 işəgötürən iştirak edib. Təklif olunan vakansiyalar üzrə əməkhaqqı 400 manatdan 900 manatadək dəyişib.
Vakansiyalar hüquq və insan resursları şöbəsinin rəhbəri, informasiya texnologiyaları üzrə mühəndis, emal qurğularının istismarı sahəsində mühəndis-texnoloq, satış nümayəndəsi, kassir, anbardar, nəzarətçi, fəhlə və digər peşələri əhatə edib.
Şabrandakı Zərifə Əliyeva adına parkda təşkil olunan tədbirdə işəgötürənlərin nümayəndələri vakansiyalar üzrə tələblər barədə iştirakçılara ətraflı məlumat veriblər.
Bildirilib ki, yarmarkaya hazırlıq çərçivəsində qeydiyyatda olan 500-dən çox işsiz və işaxtaran vətəndaşla iş aparılıb. Tədbir zamanı 205 nəfərin müraciəti qeydə alınıb.
Vakansiyalara müraciət edən şəxslərin CV-ləri qəbul olunaraq qiymətləndirilib, uyğun namizədlər növbəti seçim mərhələsinə dəvət ediliblər.
Yarmarka çərçivəsində iştirakçılara peşə seçimi, karyera imkanları, əmək bazarı, peşə hazırlığı kursları, haqqı ödənilən ictimai işlər və digər məşğulluq proqramları barədə də məlumat verilib.
