Qusar rayonunda taxıl səpini kampaniyası uğurla başa çatıb.
Shimal.News xəbər verir ki, mövsüm ərzində şum və səpin işləri vaxtında aparılıb. Mütəxəssislər bu amilin gələcək məhsuldarlığa müsbət təsir göstərəcəyini bildirirlər.
Rayon üzrə ümumilikdə 17.520 hektar ərazidə taxıl səpini həyata keçirilib. Bunun 8.550 hektarında buğda, 8.970 hektarında isə arpa əkilib. Bu göstəricilər taxılçılığın Qusarda kənd təsərrüfatının əsas sahələrindən biri olduğunu bir daha təsdiqləyir.
Son illər rayon ərazisində müasir meyvə bağlarının salınmasına xüsusi önəm verilməsi suvarılan taxıl sahələrinin müəyyən qədər azalmasına səbəb olub. Belə ki, hazırda suvarılan taxıl sahələrinin həcmi 2 930 hektar təşkil edir. Yaxın dövrdə yeni bağ sahələrinin salınması da nəzərdə tutulur.
Qış mövsümünün soyuq və qarlı keçməsi torpaq üçün faydalı hesab olunur. Hazırda rayonun əkin sahələrinin qar örtüyü altında olması mütəxəssislərin fikrincə, bol məhsul vəd edir.
