Azərbaycan və Rusiya arasında Samur transsərhəd çayının su ehtiyatlarının idarə olunması ilə bağlı növbəti mühüm görüş baş tutub. İki ölkənin Birgə Komissiyasının 29-cu iclası iyulun 9-da Qusar rayonunda keçirilib.
Shimal.News xəbər verir ki, iclas Azərbaycan Respublikası Hökuməti ilə Rusiya Federasiyası Hökuməti arasında "Samur transsərhəd çayının su ehtiyatlarının səmərəli istifadəsi və mühafizəsi sahəsində əməkdaşlıq haqqında" Saziş çərçivəsində yaradılmış Azərbaycan–Rusiya Birgə Komissiyası tərəfindən təşkil olunub.
Görüşə Azərbaycan tərəfindən Azərbaycan Dövlət Su Ehtiyatları Agentliyinin tabeliyində fəaliyyət göstərən Regional Su Meliorasiya Xidmətinin İdarə Heyətinin sədri Zakir Quliyev, Rusiya tərəfindən isə Su Ehtiyatları Federal Agentliyi rəhbərinin müavini Vadim Nikonorov həmsədrlik ediblər.
İclasda Azərbaycan Dövlət Su Ehtiyatları Agentliyinin aidiyyəti qurumlarının, Xarici İşlər Nazirliyinin, Rəqəmsal İnkişaf və Nəqliyyat Nazirliyinin, İqtisadiyyat Nazirliyi yanında Əmlak Məsələləri Dövlət Xidmətinin, eləcə də Dövlət Sərhəd Xidmətinin nümayəndələri iştirak ediblər.
Görüş zamanı Samur çayının su ehtiyatlarının iki ölkə arasında bölüşdürülməsi, su ehtiyatlarının monitorinqi, Samur Hidroqovşağının birgə istismarı və əməkdaşlığın digər aktual istiqamətləri geniş müzakirə olunub.
İclasın sonunda tərəflər görüləcək tədbirləri müəyyənləşdirərək yekun protokolu imzalayıblar.
Qeyd edək ki, Samur çayı Azərbaycan və Rusiya arasında mühüm transsərhəd su mənbələrindən biridir və onun su ehtiyatlarının birgə idarə olunması hər iki ölkə üçün strateji əhəmiyyət daşıyır.
