Qusar şəhərində yolların əsaslı təmiri ilə bağlı keçirilən tenderin qalibi müəyyənləşib.
Qusar Rayon İcra Hakimiyyəti Başçısının Aparatı şəhər yollarının əsaslı təmiri işlərinin satın alınması üzrə keçirilən tenderdə "Biznes Klas" MMC qalib seçilib. Bağlanacaq satınalma müqaviləsinin dəyəri 839 min 278 manat 54 qəpik təşkil edir.
Dövlət Vergi Xidmətinin reyestr məlumatına əsasən, "Biznes Klas" MMC 2011-ci ildə dövlət qeydiyyatına alınıb. Şirkətin nizamnamə kapitalı 10 manatdır. Hüquqi ünvanı Quba rayonunun Digah kəndində yerləşir, qanuni təmsilçisi isə Fuad Tağıyevdir.
Açıq mənbələrdə şirkətin fəaliyyəti, maddi-texniki bazası, internet səhifəsi və əlaqə vasitələri barədə geniş məlumatın olmadığı bildirilir.
Qeyd edək ki, Qusar Rayon İcra Hakimiyyətinin başçısı Sahir Məmmədxanovdur. Ötən il rayonda küçə və yolların təmiri ilə bağlı keçirilən iki tenderin qalibi isə "Ana-Yol" MMC olmuşdu. Həmin müqavilələrin ümumi dəyəri 1 milyon 416 min 682 manat 86 qəpik təşkil edib.
Mənbə: Qaynarinfo.az
