Qubaya gələn turistləri təklif edilən qiymətlər qane etmir. Bu haqda ShimalNews 12 aprel tarixində İTV-yə istinadən məlumat verir.
“Bizim hər bir rayonumuz, hər bir yerimiz gözəldir. Yəni biz istəyirik ki, qiymətləri münasib etsinlər, biz də gəlib dincələk. Mən bunu çox istərdim. Boş söhbətgahı da baha verirlər, yeməklər də bahadır, kotteclər də bahadır, bahaçılıqdır, ümumiyyətlə”, – deyə turist Naidə Əliyeva bildirib.
Sahibkarlar isə qiymətlərin yaxşı olduğunu bildirirlər:
“Əslində qiymətlərimiz elə də baha deyil. Nəzərə alsaq ki, Quba turizm zonasıdır, turizm zonasına gəliş çoxdur və hotellər dolur, avtomatik olaraq bu, qiymətlərin qalxmasına səbəb olur. Lakin biz adi vaxtlarda 80 manata verdiyimiz otaqlar üçün qiyməti hal-hazırda 100 manat civarında təyin etmişik. Bunun da səbəbi odur ki, bayram ərəfəsində bizim konsertlərimiz, şou-proqramlarımız olur və 20 manat artırılan məbləğ əslində onların xərclərini qarşılamaq üçündür. Düşünürəm ki, 100 manat 2 nəfərin istirahəti üçün bu gün ən aşağı qiymətlərdən biridir”, – deyə turizm obyektinin meneceri Təbriz Xanəliyev məsələyə münasibət bildirib.
Bu günlərdə Qubadakı turizm obyektlərinin 90%-də doluluq qeydə alınıb. Xarici turistlər arasında ərəb ölkələrindən gələnlər çoxluq təşkil edirlər. Həftəsonuna doğru turistlərin sayının daha da artacağı gözlənilir.
